فاجئت جوجل المستخدمين بخطوة جديدة، بعد ما طوّرت طريقة لهواتف Pixel تخليها تقدر تستخدم AirDrop لمشاركة الملفات مع أجهزة iPhone، لكن على ما يبدو إن الميزة دي مش هتعيش كتير، وفقًا لتوقعات الخبير الشهير في شؤون أبل مارك جورمان، اللي شايف إن الشركة هتسعى لإيقافها أول ما تقدر.
Pixel 10 يشارك الملفات مع iPhone عن طريق AirDrop
وبحسب موقع PhoneArena، جوجل أعلنت إن موبايلات Pixel 10 بقت تقدر تستخدم AirDrop مع الآيفون.
الميزة شغالة من خلال Quick Share بتاع أندرويد، لكن المدهش إن الآيفون شايف الـ Pixel كأنه جهاز iOS تاني، وده اللي بيخلي الاتصال يحصل مباشر “نظير لنظير” من غير ما البيانات تعدّي على أي سيرفر أو تتسجل.
رغم كده، جورمان متوقع إن آبل مش هتسكت، وغالبًا هتسعى تقفل الباب ده قريب جدًا.
جوجل: مستعدين نتعاون مع أبل
جوجل من ناحيتها قالت إنها منفتحة على التعاون رسميًا مع آبل علشان يوسعوا الميزة دي، لكن جورمان شايف إن آبل لو منعتها بشكل مباشر، ده ممكن يعرّضها لتدقيق قانوني أكبر، خصوصًا داخل الاتحاد الأوروبي.
أزمة آبل مع اختفاء ميزاتها الحصرية
الفترة اللي فاتت، آبل اضطرت تتنازل عن شوية ميزات كانت حصرية للآيفون بسبب القوانين الأوروبية، زي:
-
إجبار iPhone 15 على استخدام منفذ USB-C بدل Lightning
-
السماح بـ التحميل الجانبي للتطبيقات (Sideloading)
-
دعم مدفوعات NFC من شركات تانية
-
السماح بمتاجر تطبيقات خارجية
وده خلّى بعض الميزات اللي كانت آبل بتميز بيها أجهزتها “تتفتح” غصب عنها.
ولو آبل ما ردتش على حركة جوجل دي، ممكن نشوف شركات موبايلات تانية تكرر نفس الخطوة في المستقبل، وده أكيد آخر حاجة آبل عايزاها.