اختبار تحليل الشخصية: اكتشف نوع شخصيتك الحقيقي في أقل من دقيقة

شركة آبل خطفت الأنظار السنة دي في مؤتمر سبتمبر لما كشفت عن iPhone Air، واللي اتقدّم كـ أنحف آيفون في تاريخ الشركة.
في وقت كل الشركات كانت بتتجه لهواتف أكبر وأتقن، آيفون إير نزل بسُمك 5.6 ملم بس، وده خلاه مختلف تمامًا عن أي هاتف تاني في السوق.

وبعدها بدأت تقارير تقول إن شركات صينية كتير ناوية تقلّد الفكرة وتطلق هواتف رائدة فائقة النحافة عشان تنافس آبل… لكن كل ده اتغيّر بعد فشل مبيعات آيفون إير.

ليه الشركات ألغت خطتها لهواتف فائقة النحافة بعد آيفون إير؟

حسب تقارير من Sina Finance و DigiTimes، 3 من أكبر الشركات الصينية في السوق يا إمّا وقفوا تماما خطط تطوير الهواتف فائقة النحافة، يا إمّا عدّلوا استراتيجيتهم.
التغيير ده بيعكس حالة قلق كبيرة في عالم الهواتف بعد الأداء الضعيف للـ iPhone Air، اللي رغم إنه أنحف آيفون عملته الشركة واعتمادهم على إعادة تصميم كاملة… إلا إن المستهلكين ماعجبهمش الجهاز بالشكل المتوقع.

كمان الموردين الأساسيين لآبل:

• فوكسكون

• لوكسشير
  وقفوا أو قللوا خطوط إنتاج آيفون إير.

وبعد النتائج دي، الشركات الصينية بدأت تعيد توزيع مواردها — ومنها تطوير تقنيات زي eSIM — وابتعدت عن فكرة "هواتف Air" عشان تركز على الموديلات التقليدية اللي الطلب عليها مضمون أكتر.

الشركات الصينية كانت ناوية تعمل إيه؟

التقارير بتقول إن:

• شاومي كانت مجهّزة لإطلاق “نسخة Air حقيقية”، عشان تنافس آبل بشكل مباشر.

• فيفو كانت ناوية تنزل موبايل فائق النحافة ضمن فئة S متوسطة السعر.

لكن الشركتين وقفوا الشغل على الأجهزة دي، ومحدّش فيهم أعلن رسميًا عن مصير المشاريع دي لحد دلوقتي.

حتى آبل نفسها غيّرت خطتها

وفي إشاعات بتقول إن آبل كمان أجّلت الجيل الثاني من iPhone Air، وبتخطط لإعادة تصميمه بالكامل عشان تحسن عمر البطارية وأداء الكاميرا — وهما أكتر نقط اشتكى منهم المستخدمين في الجيل الأول.