آبل توسّع قائمة الأجهزة القديمة.. ووداع رسمي لـ iPhone SE الأول و أجهزة تانية كتير
وسّعت شركة آبل قائمة الأجهزة اللي بتعتبرها "قديمة" أو "قديمة جدًا"، بعد ما ضافت مجموعة جديدة من منتجاتها في فئات iPhone وiPad وApple Watch وسماعات Beats. وده معناه إن الشركة مش هتوفر لها دعم رسمي أو صيانة زي زمان. ومن أبرز الأجهزة اللي اتضافت: الجيل الأول من iPhone SE، شوية موديلات من iPad Pro، وبعض نسخ Apple Watch، وكمان مكبر الصوت Beats Pill 2.0.
-Picsart-AiImageEnhancer.webp)
iPhone SE الأول.. رسميًا بقى “قديم”
آبل صنّفت iPhone SE الجيل الأول – اللي نزل سنة 2016 بمساحتي 16 و64 جيجا – ضمن الأجهزة القديمة. والموبايل ده كانت آبل وقفت إنتاجه في 2018 قبل ما تنزل الجيل الجديد منه.
وبعد مرور أكتر من 7 سنين على طرحه، آبل ومراكز الخدمة المعتمدة مش هيوفروا ليه قطع غيار أو إصلاحات. وبالتالي، أي حد لسه بيستخدم الموبايل ده هيضطر يلجأ لمراكز صيانة غير رسمية لو احتاج يصلحه.
iPad Pro 2017 و ساعات Apple Watch Series 4 يدخلوا القائمة
كمان آبل ضمّت iPad Pro نسخة 12.9 بوصة – إصدار 2017 لقائمة الأجهزة القديمة، وده معناه توقف خدمات الصيانة الرسمية تمامًا.
وبرضه بعض إصدارات Apple Watch Series 4 مثل نسخ Nike وHermes – اللي نزلت في 2018 واتوقّف إنتاجها في 2019 – اتنقلت لقائمة الأجهزة القديمة.
بس الساعات دي لسه ممكن تتصلح على قد ما يكون فيه قطع غيار متوفرة، وده حسب ملفات الدعم اللي آبل عدّلتها مؤخرًا.
Beats Pill 2.0 رسميًا.. جهاز “مهجور”
آبل كمان أضافت Beats Pill 2.0 – السماعة اللي نزلت أول مرة سنة 2013 – لقائمة الأجهزة القديمة. وده ينهي أي دعم رسمي لإصلاحها، واللي هيضطر الناس يلجأوا لمراكز خدمة خارجية.