أزمة عالمية في أسعار الرامات.. والزيادات هتستمر لحد 2028
الأسواق العالمية بتواجه أزمة كبيرة ومش مسبوقة في أسعار الرامات سواء بتاعة الكمبيوتر أو الموبايلات، والسبب إن أسعار ذواكر DRAM وNAND ارتفعت بشكل ضخم خلال فترة قصيرة. الزيادة دي جات بعد ما شركات التكنولوجيا حوّلت جزء كبير من قدرات التصنيع لإنتاج نوع جديد من الذواكر وهو HBM المخصّصة لخوادم الذكاء الاصطناعي.
التحوّل ده خلق نقص واضح في المعروض من الذاكرة التقليدية، ونتج عنه ارتفاع كبير في الأسعار وصل للضعف خلال أسابيع قليلة، ومعاه توقعات إن الأزمة هتستمر لحد سنة 2028.
ارتفاع غير طبيعي في أسعار الرامات
حسب تصريحات مدير شركة TeamGroup العالمية للذواكر، أسعار DRAM وNAND تقريبًا اتضاعفت خلال الشهور الأخيرة.
كمان بيانات منصة DRAMeXchange أكدت إن عقود ديسمبر سجلت زيادات ما بين 80% و100% على أنواع كتير من شرائح الذاكرة.
على سبيل المثال:
-
شريحة DDR5 16GB كانت بـ 6.84 دولار في سبتمبر
-
وصلت لـ 24.83 دولار في نوفمبر
-
وبداية ديسمبر تخطت 27.2 دولار
وطبقًا للتقديرات الصناعية، تكلفة شريحة 16 جيجا وصلت حاليًا لـ 225 – 228 دولار قبل إضافة الضرائب والشحن وهوامش الربح.
ليه أسعار الرامات مولّعة؟
شركات تصنيع الذاكرة حوالين العالم بتوجه إنتاجها لذواكر HBM اللي بقت عنصر أساسي في أجهزة الذكاء الاصطناعي العملاقة زي:
-
Nvidia B300
-
خوادم AWS
-
Google
-
Microsoft
اللي كمان بتحجز الشحنات لسنين قدّام، وده قلّل إنتاج الذواكر الموجّهة للكمبيوتر والموبايلات، وخلق أزمة نقص في المعروض.
الأزمة هتنتهي إمتى؟
تقديرات TeamGroup بتقول إن مخزون الموزعين هيخلص بين الربع الأول والتاني من 2026، وبعدها الحصول على رامات تقليدية هيبقى صعب جدًا بغض النظر عن السعر.
الخبراء شايفين إن الأزمة مش هتبدأ تتحل قبل آخر 2027، وممكن تمتد لـ 2028، خصوصًا إن بناء مصنع جديد بياخد 3 سنين على الأقل، يعني أي توسعات جديدة هتشوف النور في 2029.
وبالنسبة لذاكرة NAND، فالموردين مركزين أكتر على العملاء الكبار بتوع خوادم الذكاء الاصطناعي، ومفيش توقعات إن الطلب على أجهزة الكمبيوتر والموبايلات هيرجع لمستواه الطبيعي قبل 2026، وده هيأثر كمان على أسعار الأجهزة.
تأثير الأزمة على المستهلكين
الأزمة دي هتنعكس مباشرة على أسعار:
-
أجهزة الكمبيوتر
-
اللاب توب
-
الموبايلات
لإن تكلفة المكونات الأساسية بقت أعلى بكتير.
كمان أسعار ترقية RAM بقت مرتفعة جدًا، وبعض وحدات DDR5 وصل سعرها لمستوى يقرب من أجهزة الألعاب نفسها.
محللين شايفين إن التخفيضات الحالية في المتاجر ممكن تكون آخر فرصة لشراء رامات بأسعار مقبولة قبل موجة زيادات جديدة خلال 2025 و2026.