نجا طفل أمريكي عنده 8 سنين من حادث صعق كهربائي خطير وهو نايم على سريره، بعد ما السلسلة اللي كان لابسها اتلفّت بالغلط حوالين شاحن موبايل مش مُركّب كويس. الطفل اسمه لورينزو لوبيز، وكان نايم والموبايل جنبه على السرير، والشاحن متوصّل بوصلة طالعة من فيشة قريبة.
لحظات الرعب اللي عاشها لورينزو
وأثناء ما كان بيتقلب وهو نايم، السلسلة المعدنية نزلت ودخلت في الفجوة بين الوصلة الكهربائية وشاحن الموبايل، وده خلّى الكهربا تنتقل بشكل مباشر لرقبته. لورينزو قال لقناة KWCH إنه حسّ بحرارة شديدة على جلده وحاول يصرخ، بس الكهربا منعته، وقال:
“كانت لحظة مرعبة… حسّيت إني هموت.”
سلسلة أنقذت حياة طفل
والدته، كورتني بندلتون، قالت إن ابنها قدر في آخر لحظة يشيل السلسلة وينهي الصعق، وده اللي أنقذ حياته. موظف في المستشفى قال للأم إن ثواني إضافية كانت كفيلة إنها تقتل الطفل.
الأم قالت: “ابني أنقذ نفسه حرفيًا.”
ولورينزو قال: “أنا فعلاً أنقذت نفسي… ومبسوط إني عايش.”
جراحة ترقيع جلد ورحلة علاج طويلة
تم نقل لورينزو فورًا للمستشفى، وعملوا له جراحة ترقيع جلد علشان يعالجوا الحروق اللي حصلت في رقبته.
وبحسب صفحة تبرعات على GoFundMe، فالطفل ممكن يفضل في المستشفى لمدة أسبوعين.
الأم كتبت في تحديث بتاريخ 27 نوفمبر إن ابنها “عدّى جراحة ترقيع الجلد، ورغم الألم الشديد فهو بيحارب بشجاعة وملهم لكل اللي حواليه”.
تحذير مهم للأهالي
لورينزو لسه بيتعالج لحد يوم 1 ديسمبر، حسب منشور جديد لأمه على فيسبوك.
وفي كلامها، الأم ناشدت كل الأهالي إنهم ميخلوش أطفالهم يناموا وإجنبهم أجهزة إلكترونية، وقالت إن ابنها مصر يشارك قصته علشان ينقذ أطفال غيره:
“رينزو عايز قصته توصل للناس… من فضلكم، متسيبوش أولادكم يناموا وبجنبهم أي أجهزة إلكترونية.”