وصل آخر تحديث من نظام أندرويد 16 رسميًا، وده بيأكد إن جدول الإصدارات السنوي اللي كانت ماشيه عليه جوجل وصل لنهايته. ولو قارنّا التحديث ده بالإطلاق الكبير لنظام أندرويد 16 في شهر يونيو، هنلاقي إن الإصدار الجديد 16 QPR2 يعتبر تحديث فرعي، بيركّز على تحسين الإشعارات، وتطوير شكل الأيقونات، وتحديثات في شاشات المكالمات، وغيرها من الإضافات الخفيفة. لكن الأهم إن التحديث ده يعتبر بداية لخطة جوجل الجديدة في إصدار تحديثات للنظام بشكل أسرع وأكتر انتظامًا.
جوجل تغيّر الجدول القديم بسبب تذمّر المستخدمين
الجدول القديم اللي كان بينزل تحديث ضخم كل سنة وصّل المستخدمين لحالة من عدم الرضا، خصوصًا إن في أجهزة شركات تانية كانت بتستنى شهور طويلة عشان تاخد نفس التحديثات اللي موجودة من بدري على موبايلات Pixel.
جوجل أعلنت في أكتوبر 2024 إنها هتغيّر النظام ده، وقالت إن إصدار تحديثات بشكل أسرع “هيزوّد سرعة الابتكار في التطبيقات والأجهزة”.
تحديثات صغيرة مرتين في السنة
من هنا ورايح، جوجل هتنزل تحديثات صغيرة مرتين في السنة عن طريق حزم SDK، ومعاها طبعًا الإصدارات الكبيرة اللي هتيجي بدري عن المعتاد، زي ما حصل مع أندرويد 16 اللي نزل في الربع التاني بدل الربع التالت. ده غير التحديثات الفصلية اللي بنشوفها عادة لميزات أندرويد.
شركات الموبايلات هتلحق القطر بدري
مع الجدول الجديد اللي فيه معاينات مطورين بدري وإصدارات عامة أسرع، الشركات المصنعة للموبايلات هتاخد وقت أطول للتحضير وبالتالي تقدر تنزل موبايلاتها الجديدة وهي جاهزة بأحدث نسخة أندرويد.
وطبعًا أجهزة Pixel هتفضل أول ناس تستقبل التحديثات، بس الجميل هنا إن باقي الأجهزة مش هتتأخر كتير بعدها، وده هيزوّد عدد الموبايلات اللي بتدعم الميزات الجديدة، وفي نفس الوقت يشجع المطورين يستخدموها في التطبيقات بتاعتهم بشكل أسرع.