لو إنت بتخاف تنظّف سماعات AirPods وبتقلق إنك تبوظها، وفي نفس الوقت متضايق من شكلها وهي متسخة سواء السماعات نفسها أو علبة الشحن… فإليك أسهل وأأمن طريقة لتنضيفها من غير ما يحصل لها أي ضرر، وده بحسب موقع HowStuffWorks.
أول حاجة هتحتاج شوية أدوات بسيطة:
عيدان قطن جافة
قماشة ناعمة ومن غير وبر (زي المايكروفايبر)
زجاجة كحول أيزوبروبيل 70% من أي صيدلية
❌ حاجات لازم تتجنبها وإنت بتنضّف AirPods
متغمرش السماعات أو العلبة في المية أبدًا.
ماتستخدمش أدوات حادة زي الدبابيس أو السكاكين الصغيرة.
ماتستخدمش مناديل مطهرة على شبكة السماعة… ينفع تستخدمها على السطح الخارجي بس بحذر.
إوعى تحط أي حاجة جوه منفذ الشحن… ده ممكن يبوّظ نقاط التلامس المسؤولة عن الشحن.
🎧 إزاي تنظّف سماعات AirPods؟
استخدم قطعة القطن وامسح بيها شبكة السماعة والمايك بلُطف.
في ناس بتستعمل أعواد أسنان أو دبابيس، بس آبل بتحذر من ده تمامًا.استخدم قماشة المايكروفايبر علشان تمسح باقي أجزاء السماعة وتشيل منها التراب أو الدهون.
ولو عندك فرشة مضادة للكهرباء الساكنة تبقى ممتازة للتنضيف.لو السماعات اتوّسخت بحاجة صعبة زي شامبو، برفان، أكل…
بلّل قماشة مايكروفايبر بشوية مية بس، وامسح المنطقة المتأثرة، وبعدين نشّف كويس جدًا.سيب السماعات لحد ما تنشف خالص قبل ما تستخدمها أو تحطها في العلبة.
لو معاك AirPods Pro:
الأطراف السيليكون تتشال وتتغسل تحت المية بس — من غير صابون — وبعد ما تنشف كويس رجّعها تاني.
🔋 إزاي تنظّف علبة AirPods؟
استخدم قماشة جافة، ولو محتاجة تنظيف أقوى:
حط نقطة صغيرة جدًا من الكحول الأيزوبروبيل على القماشة وامسح برفق، أو استخدم منديل مطهّر.
وخلي بالك… ممنوع دخول أي سائل جوه منفذ الشحن.برضه ما تحطش السماعات في العلبة غير لما تنشف تمامًا.
لو في تراب أو وسخ في منفذ الـ Lightning:
استخدم فرشة أسنان ناعمة ونضيفة وجافة، ومرّرها بلطف علشان تنظّف المنفذ.